قازاقستان رەسپۋبليكاسى ۇكىمەتىنىڭ قاۋلىسى  №1194

2015 جىلعى 31 جەلتوقسان, استانا, ۇكىمەت ءۇيى قوعامدىق كەڭەس تۋرالى ۇلگىلىك ەرەجەنى بەكىتۋ تۋرالى «قوعامدىق كەڭەستەر تۋرالى» 2015 جىلعى 2 قاراشاداعى قازاقستان رەسپۋبليكاسى زاڭىنىڭ 8-بابىنىڭ 5-تارماعىنا سايكەس قازاقستان رەسپۋبليكاسىنىڭ ۇكىمەتى قاۋلى ەتەدى: 1. قوسا بەرىلىپ وتىرعان قوعامدىق كەڭەس تۋرالى ۇلگىلىك ەرەجە بەكىتىلسىن. 2. وسى قاۋلى العاشقى رەسمي جاريالانعان كۇنىنەن باستاپ قولدانىسقا ەنگىزىلەدى. قازاقستان رەسپۋبليكاسىنىڭ پرەمەر-ءمينيسترى ك.ءماسىموۆ. قازاقستان رەسپۋبليكاسى ۇكىمەتىنىڭ 2015 جىلعى 31 جەلتوقسانداعى №1194 قاۋلىسىمەن بەكىتىلگەن قوعامدىق كەڭەس تۋرالى ۇلگىلىك ەرەجە 1. جالپى ەرەجەلەر 1. وسى قوعامدىق كەڭەس تۋرالى ۇلگىلىك ەرەجە (بۇدان ءارى – ۇلگىلىك ەرەجە) «قوعامدىق كەڭەستەر تۋرالى» 2015 جىلعى 2 قاراشاداعى قازاقستان رەسپۋبليكاسى زاڭىنىڭ (بۇدان ءارى – زاڭ) 8-بابىنىڭ 5-تارماعىنا سايكەس ازىرلەندى. 2. قوعامدىق كەڭەستەر – ۇلگىلىك ەرەجەنىڭ وسى تارماعىنىڭ ەكىنشى بولىگىندە كورسەتىلگەن مەملەكەتتىك ورگانداردى قوسپاعاندا, كوممەرتسيالىق ەمەس ۇيىمدارمەن, ازاماتتارمەن بىرلەسىپ مينيسترلىكتەر, قازاقستان رەسپۋبليكاسى ۇكىمەتىنىڭ قۇرامىنا كىرمەيتىن ورتالىق اتقارۋشى ورگاندار, قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن ورگاندار, سونداي-اق جەرگىلىكتى مەملەكەتتىك باسقارۋ ورگاندارى ءوز قۇزىرەتىندەگى ماسەلەلەر بويىنشا قۇراتىن كونسۋلتاتيۆتىك-كەڭەسشى, بايقاۋشى ورگاندار. قازاقستان رەسپۋبليكاسى جوعارعى سوتىنىڭ, قازاقستان رەسپۋبليكاسى كونستيتۋتسيالىق كەڭەسىنىڭ, پروكۋراتۋرا ورگاندارىنىڭ, قازاقستان رەسپۋبليكاسى پرەزيدەنتى اكىمشىلىگىنىڭ, قازاقستان رەسپۋبليكاسى ۇلتتىق بانكىنىڭ, قازاقستان رەسپۋبليكاسى قورعانىس مينيسترلىگىنىڭ, قازاقستان رەسپۋبليكاسى پرەزيدەنتى ءىس باسقارماسىنىڭ, قازاقستان رەسپۋبليكاسى پرەمەر-ءمينيسترى كەڭسەسىنىڭ, قازاقستان رەسپۋبليكاسى پارلامەنتى شارۋاشىلىق باسقارماسىنىڭ, قازاقستان رەسپۋبليكاسى ادام قۇقىقتارى جونىندەگى ۇلتتىق ورتالىعىنىڭ, رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ, قازاقستان رەسپۋبليكاسى ورتالىق سايلاۋ كوميسسياسىنىڭ, قازاقستان رەسپۋبليكاسى ارناۋلى مەملەكەتتىك ورگاندارىنىڭ قاتىسۋىمەن قوعامدىق كەڭەستەر قۇرىلمايدى. 3. مەملەكەتتىك ورگانداردىڭ جانىنان زاڭدا كوزدەلگەننەن وزگەشە تارتىپپەن قۇرىلاتىن كونسۋلتاتيۆتىك-كەڭەسشى, بايقاۋشى ورگاندار جانە كوممەرتسيالىق ەمەس ۇيىمدار «قوعامدىق كەڭەس» اتاۋىنا يە بولا المايدى جانە زاڭدا بەلگىلەنگەن وكىلەتتىكتەردى تولىق كولەمدە يەلەنە المايدى. 4. قوعامدىق كەڭەستەر ءوز قىزمەتىندە قازاقستان رەسپۋبليكاسىنىڭ كونستيتۋتسياسىن, وعان سايكەس زاڭداردى, قازاقستان رەسپۋبليكاسى پرەزيدەنتىنىڭ, قازاقستان رەسپۋبليكاسى ۇكىمەتىنىڭ اكتىلەرىن, وزگە دە نورماتيۆتىك قۇقىقتىق اكتىلەردى, سونداي-اق وسى ۇلگىلىك ەرەجەنى باسشىلىققا الادى. 2. رەسپۋبليكالىق جانە جەرگىلىكتى دەڭگەيلەردەگى قوعامدىق كەڭەستەردى قالىپتاستىرۋ 5. قوعامدىق كەڭەستەر زاڭمەن كوزدەلگەن تارتىپپەن قالىپتاستىرىلادى. 6. قوعامدىق كەڭەستەر ەكى دەڭگەيدە – رەسپۋبليكالىق جانە جەرگىلىكتى دەڭگەيلەردە قۇرىلادى, اۆتونومدى جانە دەربەس بولىپ تابىلادى. قوعامدىق كەڭەستەر اراسىنداعى ءوزارا ءىس-قيمىل زاڭدا كوزدەلگەن تارتىپپەن ىسكە اسىرىلادى. 7. قوعامدىق كەڭەستەردىڭ رەسپۋبليكالىق دەڭگەيىنە زاڭنىڭ 1-بابى 1-تارماعىنىڭ ەكىنشى بولىگىندە كورسەتىلگەن مەملەكەتتىك ورگانداردى قوسپاعاندا, كوممەرتسيالىق ەمەس ۇيىمدارمەن, ازاماتتارمەن بىرلەسىپ مينيسترلىكتەر, قازاقستان رەسپۋبليكاسى ۇكىمەتىنىڭ قۇرامىنا كىرمەيتىن ورتالىق اتقارۋشى ورگاندار, قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن ورگاندار قۇراتىن قوعامدىق كەڭەستەر جاتادى. 8. جەرگىلىكتى دەڭگەيدەگى قوعامدىق كەڭەستەرگە ءتيىستى اكىمشىلىك-اۋماقتىق بىرلىكتىڭ قوعامدىق كەڭەستەرى جاتادى. بۇل رەتتە اۋىل, كەنت, اۋىلدىق وكرۋگ, اۋداندىق ماڭىزى بار قالا دەڭگەيىندەگى قوعامدىق كەڭەس فۋنكتسيالارى جەرگىلىكتى قوعامداستىق جينالىسىنا جۇكتەلەدى. 9. قوعامدىق كەڭەستەگى ازاماتتىق قوعام وكىلدەرىنىڭ سانى ونىڭ مۇشەلەرىنىڭ جالپى سانىنىڭ كەمىندە ۇشتەن ەكىسىن قۇراۋعا ءتيىس. 3. قوعامدىق كەڭەستى قالىپتاستىرۋ جونىندەگى جۇمىس توبىنىڭ مۇشەلەرىن ىرىكتەۋ ءتارتىبى, ونى وتكىزۋ مەرزىمى 10. قوعامدىق كەڭەستەردى مەملەكەتتىك ورگانداردىڭ وكىلدەرىنەن جانە كونكۋرستىق نەگىزدە – كوممەرتسيالىق ەمەس ۇيىمداردىڭ وكىلدەرىنەن, ازاماتتاردان تۇراتىن جۇمىس توبى (بۇدان ءارى – جۇمىس توبى) قالىپتاستىرادى. قوعامدىق كەڭەس مۇشەلىگىنە كانديداتۋرالاردى كوممەرتسيالىق ەمەس ۇيىمدار, ازاماتتار ۇسىنۋى, ونىڭ ىشىندە ادامداردىڭ ءوزىن-ءوزى ۇسىنۋى مۇمكىن. 11. جۇمىس توبىنىڭ قۇرامىندا مەملەكەتتىك ورگاننان وكىلدىك ەتۋ جۇمىس توبى مۇشەلەرىنىڭ جالپى سانىنىڭ ۇشتەن ءبىر بولىگىنەن اسپاۋى ءتيىس. اتالعان وكىلدىكتىڭ دەربەس قۇرامىن مەملەكەتتىك ورگاننىڭ باسشىسى ءوزى دەربەس ايقىندايدى. بۇل كەزدە مەملەكەتتىك ورگاننىڭ باسشىسى قوعامدىق كەڭەستە قارالاتىن ماسەلەلەردىڭ باسىمدىعىنا سۇيەنۋگە ءتيىس. 12. جۇمىس توبىنىڭ قۇرامىندا ازاماتتىق قوعامنان وكىلدىك ەتۋ جۇمىس توبى مۇشەلەرىنىڭ جالپى سانىنىڭ كەمىندە ۇشتەن ەكى بولىگىن قۇرايدى جانە كوممەرتسيالىق ەمەس ۇيىمداردىڭ, ازاماتتاردىڭ ۇسىنىستارى نەگىزىندە قالىپتاستىرىلادى. 13. جۇمىس توبىنىڭ ساندىق قۇرامىن رەسپۋبليكالىق دەڭگەيدە – مەملەكەتتىك ورگاننىڭ باسشىسى, جەرگىلىكتى دەڭگەيدە جەرگىلىكتى وكىلدى ورگاننىڭ باسشىسى ايقىندايدى. 14. رەسپۋبليكالىق دەڭگەيدەگى مەملەكەتتىك ورگان, جەرگىلىكتى وكىلدى ورگان جۇمىس توبىنىڭ مۇشەلەرىن سايلاۋ تۋرالى كونكۋرستى وتكىزۋ تۋرالى حابارلاندىرۋدى بۇقارالىق اقپارات قۇرالدارىندا جاريالايدى جانە (نەمەسە) مەملەكەتتىك ورگاننىڭ ينتەرنەت-رەسۋرسىندا ورنالاستىرادى. 15. كوممەرتسيالىق ەمەس ۇيىمداردىڭ وكىلدەرى جانە ازاماتتار كونكۋرس تۋرالى حابارلاندىرۋ جاريالانعاننان كەيىن 10 كۇن مەرزىمدە رەسپۋبليكالىق دەڭگەيدەگى مەملەكەتتىك ورگانعا, جەرگىلىكتى وكىلدى ورگانعا جازباشا تۇردە جۇمىس توبىنا كانديداتۋرالار بويىنشا ۇسىنىستارىن جىبەرەدى. ءوزىنىڭ ۇسىنىستارىن جىبەرگەن ءاربىر كوممەرتسيالىق ەمەس ۇيىم جانە ءاربىر ازامات ءبىر عانا كانديدات ۇسىنا الادى. 16. ازاماتتىق قوعامنان جۇمىس توبىنا كانديداتتارعا زاڭنىڭ 10-بابىنىڭ 1-تارماعىنا سايكەس تالاپتار قويىلادى. 17. رەسپۋبليكالىق دەڭگەيدەگى مەملەكەتتىك ورگان, جەرگىلىكتى وكىلدى ورگان كونكۋرس مەرزىمى اياقتالعان سوڭ كەلىپ تۇسكەن ۇسىنىستاردىڭ نەگىزىندە جۇمىس توبىنا كانديداتتار ءتىزىمىن ازىرلەيدى جانە ەكى اپتا مەرزىمدە جۇمىس توبىنا كانديداتتاردى, كوممەرتسيالىق ەمەس ۇيىمداردىڭ وكىلدەرى مەن ازاماتتاردى شاقىرا وتىرىپ وتىرىس ۇيىمداستىرادى. 18. رەسپۋبليكالىق دەڭگەيدەگى مەملەكەتتىك ورگاننىڭ باسشىسى, جەرگىلىكتى وكىلدى ورگاننىڭ باسشىسى (بۇدان ءارى – جۇمىس توبىنىڭ باسشىسى) وتىرىستى اشادى جانە جۇرگىزەدى. 19. وتىرىستا وسى ۇلگىلىك ەرەجەنىڭ 14 جانە 15-تارماقتارىنىڭ تالاپتارىنا سايكەس كوممەرتسيالىق ەمەس ۇيىمدار مەن ازاماتتار ۇسىنعان كانديداتۋرالاردى تالقىلاۋ جۇرگىزىلەدى. كانديداتۋرالاردى تالقىلاۋ قورىتىندىسى بويىنشا اشىق داۋىس بەرۋ جۇرگىزىلەدى. وتىرىسقا كەلمەگەن كانديداتۋرالار بويىنشا داۋىس بەرۋ جۇرگىزىلمەيدى. ەڭ كوپ داۋىس جيناعان كانديداتتار جەڭىمپاز بولىپ تابىلادى. تەڭ داۋىس سانىن جيناعان كانديداتۋرالار بويىنشا جۇمىس توبى باسشىسىنىڭ داۋسى شەشۋشى بولىپ ەسەپتەلەدى. 20. جۇمىس توبىنىڭ قۇرامى مەملەكەتتىك ورگان باسشىسىنىڭ شەشىمىمەن بەكىتىلەدى. جۇمىس توبىنىڭ باسشىسى ونىڭ مۇشەلەرى قاتارىنان حاتشىنى تاعايىندايدى. 21. جۇمىس توبىنىڭ قۇرامى مەملەكەتتىك ورگاننىڭ, جەرگىلىكتى وكىلدى ورگاننىڭ رەسمي ينتەرنەت-رەسۋرسىندا جاريالانادى. 4. جۇمىس توبىنىڭ وكىلەتتىكتەرى 22. جۇمىس توبى مىناداي وكىلەتتىكتەردى جۇزەگە اسىرادى: 1) تۇرعىنداردى قوعامدىق كەڭەس مۇشەلەرىن سايلاۋ جونىندەگى كونكۋرس تۋرالى حاباردار ەتەدى; 2) قوعامدىق كەڭەس مۇشەلەرىنىڭ ساندىق قۇرامىن ايقىندايدى; 3) قوعامدىق كەڭەس مۇشەلەرىن سايلاۋ ءراسىمىن وتكىزەدى; 4) قوعامدىق كەڭەس تۋرالى ەرەجە جوباسىن وسى ۇلگىلىك ەرەجە نەگىزىندە ازىرلەيدى. 5. جۇمىس توبىنىڭ وتىرىستارىن دايىنداۋ جانە وتكىزۋ 23. جۇمىس توبىنىڭ وتىرىستارى وتكىزىلگەنگە دەيىن كەمىندە بەس جۇمىس كۇنى قالعاندا حاتشى جۇمىس توبىنىڭ مۇشەلەرىن ونىڭ وتكىزىلۋ ۋاقىتى, ورنى, تالقىلاناتىن ماسەلەلەر تۋرالى قۇلاقتاندىرادى. 24. جۇمىس توبىنىڭ وتىرىسى ونىڭ تىزىمدىك قۇرامىنىڭ ۇشتەن ەكىسى قاتىسقان كەزدە زاڭدى بولىپ تابىلادى. 25. جۇمىس توبىنىڭ وتىرىستارىن جۇمىس توبىنىڭ باسشىسى جۇرگىزەدى. 26. جۇمىس توبىنىڭ وتىرىستارىندا شەشىمدەر اشىق داۋىس بەرۋ جولىمەن قاتىسىپ وتىرعان مۇشەلەرىنىڭ كوپشىلىك داۋىس بەرۋى ارقىلى قابىلدانادى. 27. جۇمىس توبىنىڭ وتىرىستارىندا حاتتاما جۇرگىزىلەدى, وعان توراعا مەن حاتشى قول قويادى. 28. جۇمىس توبى قوعامدىق كەڭەس مۇشەلەرىن سايلاۋ جونىندەگى كونكۋرس تۋرالى حابارلامانى رەسپۋبليكالىق جانە (نەمەسە) جەرگىلىكتى بۇقارالىق اقپارات قۇرالدارىندا جانە (نەمەسە) مەملەكەتتىك ورگاننىڭ ينتەرنەت-رەسۋرسىندا ونىڭ اتاۋىن, پوشتالىق مەكەنجايىن, قۇجاتتاردى تاپسىرۋ مەرزىمدەرىن, قۇجاتتار جانە وزگە دە مالىمەتتەر جىبەرىلەتىن ەلەكتروندىق پوشتا مەكەنجايىن كورسەتە وتىرىپ جانە زاڭنىڭ 10-بابىنىڭ 2-تارماعىنا سايكەس وزگە دە مالىمەتتەردى جاريالايدى. 29. جۇمىس توبى وتىرىستاردا قوعامدىق كەڭەس مۇشەلىگىنە كانديداتتار كونكۋرسىنا قاتىسۋ ءۇشىن كەلىپ تۇسكەن قۇجاتتاردى تالقىلاۋدى جانە ءاربىر كانديدات بويىنشا اشىق داۋىس بەرۋدى جۇرگىزەدى. 30. كوممەرتسيالىق ەمەس ۇيىم بولىپ تابىلاتىن ءبىر زاڭدى تۇلعادان قوعامدىق كەڭەسكە ءبىر عانا وكىل سايلانۋى مۇمكىن. 31. رەسپۋبليكالىق دەڭگەيدەگى قوعامدىق كەڭەستەردى قۇرۋ كەزىندە ءبىر ادام تەك ءبىر قوعامدىق كەڭەستىڭ مۇشەسى بولىپ سايلانا الادى. 32. قۇرىلعان قوعامدىق كەڭەس قۇرامى مەملەكەتتىك ورگان شەشىمىمەن, نەمەسە جەرگىلىكتى وكىلدى ورگان شەشىمىمەن بەكىتىلەدى جانە بۇقارالىق اقپارات قۇرالدارىندا جاريالانۋعا جانە (نەمەسە) ءتيىستى ورگاننىڭ ينتەرنەت-رەسۋرسىندا ورنالاستىرىلۋعا ءتيىس. 33. قوعامدىق كەڭەستىڭ ءبىرىنشى وتىرىسىن جۇمىس توبىنىڭ باسشىسى اشادى, اشىق داۋىس بەرۋ ارقىلى قوعامدىق كەڭەستىڭ توراعاسى, حاتشىسى جانە تورالقانىڭ بۇكىل قۇرامى سايلانادى. 34. قوعامدىق كەڭەس توراعاسى, حاتشىسى, تورالقاسى سايلانعان سوڭ جۇمىس توبىنىڭ جانە ونىڭ توراعاسىنىڭ وكىلەتتىكتەرى توقتاتىلادى. 6. وتپەلى جانە قورىتىندى ەرەجەلەر 35. وسى ۇلگىلىك ەرەجە جەرگىلىكتى قوعامداستىق جينالىسىن قالىپتاستىرۋ تارتىبىنە قولدانىلمايدى, ول قازاقستان رەسپۋبليكاسىنىڭ جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى زاڭناماسىمەن رەگلامەنتتەلەدى. 36. جەرگىلىكتى قوعامداستىق جينالىسى قوعامدىق كەڭەستىڭ فۋنكتسيالارىن «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» 2001 جىلعى 23 قاڭتارداعى قازاقستان رەسپۋبليكاسىنىڭ زاڭىمەن جانە زاڭمەن بەلگىلەنگەن وكىلەتتىكتەرگە سايكەس جۇزەگە اسىرادى.